南昌街 八仙餅店

曾幾何時，每日放學都於銅鑼灣蹓躂，但現在的銅鑼灣充斥着化妝品店、金飾店、藥房等，感覺陌生；相反，真心感激深水埗尚未得到自由行的垂青，好使碩果僅存的手做月餅得以保留，讓差不多失傳的工夫仍有薪火相傳的機會，我們才有幸吃其原始風味！

餅舖仔　為街坊繼續做                                                                                                                                        距離中秋不到兩星期，這陣子無疑是月餅市場最緊張的日子，市面上大部份月餅，都是由機器生產，全手工製月餅幾乎絕無僅有。這間從五月底已經開始做月餅、位於深水埗的八仙餅家，屬該區的知名小店。早在1966年，「八仙」這名字已扎根在深水埗，不過後生一輩未必知道，八仙餅店原先是長沙灣道的八仙大茶樓，到1979年大茶樓變餅店，更由長沙灣道搬至南昌街，一直經營至今，八仙餅家第二代老闆張子榮依然堅持每年推出手做月餅。「我爸爸以前係八仙大茶樓嘅師傅，後來酒樓結業，爸爸唔捨得，覺得唐餅仲有得做，於是就以『八仙』名義東山再起，開間唐餅店，一做就咁多年，我以前都喺舖度做餅，爸爸退休後就由我嚟接管，我哋只係餅舖仔箒！」這裏無論是標誌、海報，甚至是餅模，都是由茶樓那邊搬過來，足有40多年歷史，為何堅持手做月餅？張先生帶欷歔道：「我哋每年都係賣四五萬個月餅，人哋可能一日都做咁多，但唔做，每年買開嘅公公婆婆點呢？啲街坊又點呢？做得到我都會繼續做。」                                    

見證手做月餅興衰                                                                                                                                        與許多傳統餅家一樣，八仙餅家都是前舖後工場，入到數十呎的工場，室溫猶如桑拿房般，老師傅及徒弟共四人大汗叠細汗地不斷搓餅，當我與攝影師擠入餅房，空間顯得更擠逼，光頭佬師傅即說：「記者小姐，你隨便問！但我哋就停唔到手做訪問，今日要做成千個餅，好趕啊！」快80歲的光頭佬師傅，做了月餅50多年，見證手做月餅的興衰。「我廿歲時嚟香港，有朋友介紹我入瓊華，瓊華月餅以前好出名、掛大海報嗰間呀！做咗幾十年，瓊華被收購，我就去奇華，幾年後佢哋轉用機器整餅，之後去蓮香，點知都係一樣，時代唔同，要淘汰就會被淘汰！好彩幾年前有人介紹我入嚟，手做月餅嘅地方五隻手指數得晒！」那為甚麼你還入行呢？我靦腆地問徒弟阿永，「之前做過其他工，但都做唔長，朋友介紹我嚟做，雖然辛苦，但每年有咁多人買我哋嘅月餅，辛苦都值得！」那手做月餅和機做的味道有何不同？光頭佬師傅搶答：「機做可能仲好味，但我哋有人情味囉！」確實，短短數小時的採訪，八仙的人流不斷，買花塔餅的有，買十盒八盒月餅的都有。時不與我，雖然手做月餅是夕陽行業，幸好八仙不是位於銅鑼灣或旺角，不然隨着時間巨輪，不是變成金舖就是藥房。這間依靠深水埗街坊維生的小店，與這個社區有着一段不可分割的鄰里情，希望手做月餅不會隨社會變得富裕而消失殆盡，歷史能繼續一代傳一代。                                    

八仙餅家                                                                                                                                        電話：27299440

地址：深水埗南昌街197號